Košarkaši Partizana savladali su ekipu subotičkog Spartaka u “Dudovoj šumi” rezultatom 80:82, a meč je riješio novajlija Antonio Rivs, koji je košem sa poludistance odveo svoj tim do trijumfa.
Partizan sada ima skor 4-0, dok je Spartak na učinku od dvije pobjede i dva poraza.
Prvo poluvrijeme proteklo je u znaku Itana Tompsona. Bek Partizana izvanredno je šutirao i ubacio 23 poena, uz četiri pogođene trojke iz pet pokušaja. Na taj način mnogo bolje nego što se očekivalo nadoknadio je odsustvo Karlika Džonsa, kojeg je trener Đoan Penjaroja odmorio nakon velikih napora u evroligaškom vječitom derbiju prije dva dana.
Uz Tompsona, u centru pažnje bio je i Antonio Rivs, koji je večeras debitovao u dresu Partizana, ali u prvom poluvremenu nije pokazao svoje šuterske mogućnosti.
Ipak, Partizan je imao prednost koju je uspješno održavao, pa je nakon 20 minuta igre vodio rezultatom 45:39.
Međutim, u trećoj četvrtini “crno-bijeli” su ostali bez Tompsonovih poena, a nisu imali drugog šuterski raspoloženog igrača, što se vrlo brzo odrazilo na rezultat. Doduše, tokom većeg dijela ovog perioda Partizan je održavao blagu prednost, dok je Kajl Olmen pokušavao da preuzme glavnu ulogu u napadu.
Ipak, to je bilo kratkog daha, a Spartak je furiozno završio treću četvrtinu. Domaći su ne samo istopili prednost gostiju već su uspjeli i da preokrenu rezultat i povedu sa osam poena razlike – 65:57.
Kriza Partizana nastavila se i početkom posljednje dionice. Odbrana “crno-bijelih” postajala je sve slabija, pa su Subotičani preko Omića stigli i do dvocifrene prednosti – 72:61.
Trener Penjaroja je u tim trenucima vratio Tompsona u igru, a Pajola je pogodio trojku i vratio nadu gostima. Uslijedila je i njegova ukradena lopta, nakon koje je iznudio prekršaj odličnog Drobnjaka.
Bio je to početak Partizanove serije 10:0, a poenima Rivsa uz faul “crno-bijeli” su prišli na samo poen zaostatka – 72:71.
Na ulasku u posljednja četiri minuta Kevarijus Hejs izjednačio je na 73:73, ali je Danilo Nikolić uzvratio trojkom za novo vođstvo Spartaka. Na drugoj strani uslijedila je još jedna sjajna akcija Pajole, koji je asistirao Hejsu za poene uz faul.
Partizan je tako ponovo izjednačio, a ubrzo i poveo zahvaljujući prvim poenima Itana Tompsona u drugom poluvremenu – 78:76.
Ušlo se u dramatičnu završnicu, a Partizanov novajlija Antonio Rivs preuzeo je odgovornost. Na oko 26 sekundi prije kraja pogodio je šut sa poludistance za vođstvo “crno-bijelih” od 82:80.
Trener Spartaka Vlade Jovanović reagovao je tajm-autom, nakon kojeg ni Jeremić ni Drobnjak nisu uspjeli da donesu pobjedu domaćoj ekipi.
Najbolji u redovima Spartaka je bio Danilo Nikolić sa 19 postignutih poena, dok je pored njega dobar bio i Igor Drobnjak sa 11 ubačaja.
Kod Partizana je briljirao Tompson sa 23 koša, a po 11 poena su postigli Rivs i Hejs.
Još jedna pobeda! Bravo crno-beli!🖤🤍 https://t.co/t3MJ2hOxsJ
— KK Partizan Mozzart Bet (@PartizanBC) October 24, 2026
