Reprezentacija Argentine sigurno je pobijedila Alžir rezultatom 3:0 i tako na dobar način otvorila prvenstvo.
Oba tima su otvorili utakmicu golovima iz ofsajda, na jednoj strani je pogodio Mesi, a na drugoj Čaibi. Ipak, “gaučosi” su preuzeli kontrolu i već u 17. minutu je Lionel Mesi sa ruba šesnaesterca u svom stilu pogodio rašlje, te donio vođstvo svom timu. Do kraja poluvremena su na obe strane prijetili Mesi i Čaibi, ali se na poluvrijeme otišlo sa samo jednim golom.
Nastavili su Argentinci sa dobrom igrom i nagrada je došla u 60. minutu. Mekalister je šutirao iz daljine, golman Alžira Luka Zidan je užasno reagovao i odbio loptu na nogu Mesija koji lagano pogađa nebranjenu mrežu. Nastavio je Mesi da pritiska Zidana, ali je ovaj put sin legendarnog Zizua odbranio udarac omalenog Argentinca. Ipak, ništa nije moglo da spriječi Mesija da dođe do het-trika. Povukao je Lionel sa centra loptu, odložio je na lijevu stranu do Gonzaleza, a ovaj mu je vratio na rub šesnaesterca. Mesi se namjestio a svoju lijevu nogu i sigurno pogodio donji lijevi ugao gola. Nemoćan je bio Zidan ovde. Do kraja utakmice se oborio tempo utakmice i Argentinci su dobro započeli odbranu trofeja.
Mesi je sa ova 3 gola postigao 16 pogodaka na Mundijalima i tako se izjednačio na vrhu liste sa Miroslavom Kloseom. Nema sumnje da će Argentinac u narednim mečevima oboriti rekord njemačkog fudbalera.
Svjetski šampioni će sljedeći meč igrati protiv Austrije, a Alžir će ukrstiti koplja sa Jordanom.
3 goals, 3 points, 1 Messi. #FIFAWorldCup
— FIFA World Cup (@FIFAWorldCup) June 17, 2026
