U terminu od 16 časova odigrano je pet utakmica trećeg kola engleske Premijer lige, a najviše razloga za zadovoljstvo ima Mančester siti, koji je zabilježio i treću pobjedu u isto toliko kola.
Rezultati su bili: Mančester siti – Koventri 1:0, Notingem Forest – Totenhem 0:0, Brentford – Sanderlend 1:1, Brajton – Lids 1:1 i Fulam – Kristal Palas 2:3.
Mančester siti je nastavio savršen niz, ali je protiv Koventrija mnogo teže nego što se očekivalo stigao do tri boda. Ekipa Enca Mareske još uvijek se privikava na život nakon ere Pepa Gvardiole, a iako igra nije na željenom nivou, rezultati za sada predstavljaju odličan znak za navijače „građana“.
Jedini gol na utakmici postigao je Erling Haland u 26. minutu. Norvežanin je glavom zatresao mrežu poslije asistencije Semenja i tako donio pobjedu svom timu.
Na ovoj utakmici debitovao je i rekordno plaćeni Enco Fernandez, dok je Koventri ostao bez bodova nakon tri kola. Frenk Lampard tako već ima ozbiljan zadatak da sačuva ekipu u povratničkoj sezoni u elitnom rangu.
Totenhem je osvojio prvi bod u sezoni, ali i dalje čeka na prvi gol. Ekipa Roberta De Zerbija nije uspjela da pronađe put do mreže Notingem Foresta, koji je nastupio sa Nikolom Milenkovićem u startnoj postavi. Meč je završen bez pogodaka, pa oba tima imaju još mnogo toga da poprave u nastavku sezone.
Bez pobjednika je završen i duel Brentforda i Sanderlenda. Domaćin je poveo u 57. minutu preko Janelta, nakon brojnih promašaja „crnih mačaka“ u prvom poluvremenu. Sanderlend je ipak stigao do izjednačenja u 82. minutu, kada je Le Fe bio precizan sa bijele tačke za konačnih 1:1.
I u Brajtonu je viđen remi. Lids je poveo već u 15. minutu preko Boglea, a gosti su u prvom poluvremenu propustili nekoliko velikih prilika da dodatno uvećaju prednost. Kazna je stigla u 71. minutu, kada je Luka Vušković pogodio za 1:1.
Brajton je u završnici potpuno preuzeo inicijativu i ozbiljno pritiskao, ali je Lids uspio da izdrži do kraja i osvoji vrijedan bod.
Najuzbudljivije je bilo u malom londonskom derbiju, gdje je Kristal Palas poslije preokreta savladao Fulam sa 3:2.
Fulam je poveo u 11. minutu preko Kinga, ali je Mičel u 35. donio izjednačenje Palasu. Domaćin je ipak ponovo poveo neposredno pred odlazak na odmor, kada je Palasios pogodio za 2:1.
U nastavku je uslijedio potpuni preokret. Mičel je svojim drugim golom u 54. minutu ponovo poravnao rezultat, da bi Čilvel u 77. minutu pogodio za 3:2 i donio Palasu sva tri boda.
Fulam tako poslije tri kola ostaje bez pobjede, dok Kristal Palas nastavlja sa dobrim rezultatima.
